Şahin İmranov Pekin Olimpiadasının yarımfinalına vəsiqə qazanıb
Yazar: azizmehdi
Boks üzrə Azərbaycan yığmasının kapitanı Şahin İmranov XXIX Pekin Yay Olimpiya Oyunlarının yarımfinalına vəsiqə qazanıb. “APA-SPORT” agentliyinin məlumatına görə, 57 kq çəki dərəcəsində mübarizə aparan təmsilçimiz bu gün ¼ finalda kubalı İdel Torrienteni məğlub edib.
Mübarizə bərabər şəraitində keçsə də, əzmkarlıq nümayiş etdirən Ş. İmranov güclü rəqibinə 16:14 hesabı ilə qalib gəlib. Bu uğurdan sonra özü üçün minimum bürünc medalı təmin edən 28 yaşlı boksçumuz avqustun 22-də yarımfinalda fransalı Hedafi Celfirlə qarşılaşacaq.
Qeyd edək ki, Ş. İmranov bunadək Qalib Cəfərovu (Qazaxıstan) və Nikolos İzoriyanı (Gürcüstan) məğlub edib.
